নিজো জাদর ভালেদ, কন্না ন-চাই?

 

ত্রিপন তেইয়া

দাগ কধা; জাদে জাদ তগায়, কাঙারাই গাদ তগায়। বাপভেই, মা বোনলক, আঝা গরং মর এ কুজ-গজ্জে লেগাআন, নিজোরে কোজলি গরি, আমল দিনেই পরি চেবা। ভালকদিনর গাধেই রাগেয়ে মন কধানি, এচ্চে মত্তুন কবার ভারি ধারাজ গরের। আঝা গরং, এ চিগন কধানি, জুম্ম জাদ’ ভালেদি-গঙারত, আরাচাক কাজেই নেজেব, জাদর কোচপানা গভীন গরিব। সালেন, মুই ইক্কি, ম এ-চিগন লেগানর- কধানি ফগদাঙ গরি যাঙর।

কধানির আগেন্দি, পলে¬্য নিজোরে নিজে পুজোর গরি, আমি কি নিজো কধা (ভাজ) কোচ পেই, না ন-পেই? মাত্তর, কোচ ন’ পেলে, এক্করে লুঙি মারি, পুরি ফেলেই, নয়-ও কই, গব-ও নদি, আ নয়-ও চেদেই। সিয়েন ন-গরি, আমারে বাঙলা ইংরেজি ক’লে তুও সাজিবো। জাদরে দোবাংসা গরি, বাগও নয় ফেবোও নয় গরিথোইনে লাব নেই। আ ন-অলে, সারা জিংকানিয়ান নাদং-সারা, রিবেং পজা গরি থে-যেই। নিজোরে জুম্ম জাদ নানু-হলেই লাব নেই। এনেও আমা বুরোবুরিয়ে কই যেইয়োন-চাঙত্তুন পজ্জ্যে ’মা, জাদত থেলে ন লুগোই।

আ, আমা জুম্ম জাদত, যারা সাভা হলান, ধাঙর হলান, লেগাপরা থুম গজ্জন, রেজ্জো কাজা ভোঙি ফুরেয়ন, তারা ন-দেগন কন্না কুধু কি গত্তন? তারার চিৎ নেই, জিৎ নেই? তারা মা-বাবর সাদাঙা পূও-সা নাকি ? তারা পিত্তিমিত আদেই এচ্চোন নাকি ? তারা জুম্ম-জাদরে কি দিযেই পাত্তন? ইয়েনি কলে দ, নিজোরে নিজে হেনা ন যায়, গেজা ন মরে। গাই রে গাই, রন কাবে। ইত্তুন পারা লাজে-বার আ কি আঘে?

আওজর গাবুজ্জে-গাবুরি, ভেই-বোন লক, মনত দুগ ন’ পেয়ো, জুম্ম-ভাঝত্ এক্কান অজবা আঘেদে “মগদা”। এ কধা-আন, দোলে-দালে আর ভাঙিলে, গমও আঘে, ভান্যেও আঘে। আহ্ঝার অলেও নিজো ভাজ, নিজো কধা। দাগ-কধা, পর নাঙে ফেলাচেলা, আমনঅ নাঙে সোনা দলা। আদেক্কে গরি-রাগ উদিলে, চিদত ফুদিলে, হুঝি অহলে, উচ্ছো গরিলে, কোজ্জে বাজেলে “মগদা” কহ্য় ন’ পেলে ইহ্ল ন অয়। ইয়েন মিঝে নয়, নিজো কধালোই কধা কধে যেত্তমান ইহ্ল অয়, পর কধালোই কধা কধে সেত্তমান ইহ্ল ন’ অয়।

মা-পেদত থেনেই, মা-পেদত্তুন নীগিলিনেই, মা-হরত ধাঙর অইনে, মা-মুওত্তুন কধা শিগিনেই, মা-কধালোই কির্বে পেনেই-তুওদ নিজোর মাবো-রে, মা-কধা, ইহ্ধোত ন’ তুলি, পুরি ফেলেই। নিজো কধা নিজে ন লিগি, লিগিবার চেলে- আমি ছলনা দি, আমার কিয়ে শুলই, আলসি গরে। দাগ কধা-কাম’ দরে ফগির। ইয়েনি গরি পেলে, গরা বাজে দিলে, উগুদো আমি লাজেই, নিজোরে অম’কদ’ চিগন, সেদাম-পাঞ্জা মনে গরি। এনে অলে, পর’-ভাজ, পর’-কধালই, নিজোরে নিজে ধাঙর হলেই, বার গরি। এনেও, আমার এক্কেনাও চেদন নেই। আমি শনমরা।

আমা জুম্ম-উনে, বাঙলা-ইংরেজি কই পাল্যে, লিগি পাল্যে, কধক দগ্; কাই কুরে ঘনেই ন পারে। জু পেলে বেজা মারন। নিজো কধানি ফেজ গরন। পূও-সারেও নিজো কধা ন’ শিগান।। দেই ন পারি পররে, পররে ভেঙেই, পররে বিজ দেগি, পরলে¬াই জিদ বাজেই, পররে পিজুম গরি-তুওদ’ নিজোরে আমি সলং বদলেই ন পারি। আমি ভিলে আর-অ জুম্ম জাদ!

আমাত্তুন বাঙলা-ইংরেজি শিগে পরে, ইয়েন ঠিক আঘে, এক্করে যে নিজো কধা ন কবং, পুরি ফেলেবং-ইয়েন দ ওই ন-বারে। আমি, নিজো কধানি সাদাঙা ভাবি। সেনত্তেই দ’ আমি, এজ’ অদ্ধঙ্গ অই আঘি। মান্নোরে কিচ্ছু দেগেই ন পারি, আমা চিদে আমি ন গরি। নিজোর জায়-জুক্কল, নিজে ন গরি। সেনত্তেই, জুম্ম জাদ ভালেদ অহ্ধং চেলে, আমা পোজা হালে¬াং, আমাত্তুন সমরা পরিব’। নিজো জাদর বিজক দ জাদরে গজেই দি যা পরিব’।

আ, গমেদালে রিঙি চেলে, আমাত্তুন কি নেই? আমাত্তুন দ’ বেক্কানি আঘে। আমি ওলিপ গরি, ন-লারি, ন-শিগি, ন-সমুরি। আমা কাম কন্না গরি দিব? যেন আমি, বদারে-ডিম কই, এহ্রারে-মাংস কই, গুররে-বাচ্চা কই, কুরোরে-মুরগি কই, শিলুম উরিলে পিনি কই, পেন পিনিলে উরি কই।  উরিঙে-রে হরিণা, বাঘেইসুরি-রে বাঘাইছড়ি, নান্যেচর’রে নানিয়ার চর, রাঙামাত্যে-রে রাঙ্গামাটি-কই কই, লিগি লিগি বেরেই। ইয়েনি-দ’ চেইচেদি নিজোরে নিজে শুম মারানা, নিজে নিজোর বিজ লুগে দেনা, নিজে নিজে বংশ উদোনা।

তেহ্ সালেন, ইক্কিনে আমার কি গরানা? মন-ডর’ গরি, ঝাদি ঝাদি তেম্মাং-সুল¬ুক গরি। জাদ’-আঝল গুনর কামত লামি। ন-অলে দ’, জুম্ম জাদর, জুম্ম-ভাঝর, মাজারা লুগেব’, পিত্থিমিত জুম্ম জাদ হোলেই ন পারিবং।

এ সেরেন্দি, আ এক্কান কধা, নিজো ভাজ, নিজো কধা, নিজে কোচ ন’ পেলে- নিজোর ঘরবোরে, নিজোর জাদরে কুত্তুন আমি কোচ পেবং? সেনত্ত্যে দ আমা বিজগত, আমা গুরু ঠাগুরুনে, অঝা-বান্দর-উনে, গরি যেইওন, আমারে দেগেই যেইওন, এঝ’ দেগাদন, লাম্বা-বাদি, চুচ্চেং-ভুত্তেং। এক্কান ঘরত নআদি, জাদর ভালেদি নচেই। মুজুঙে উজেবার সলা-নত, রেনারেনি, কেনাকেনি আর কধক? বেক্কুনর কবাল দ এক্কই। দাগ কধা-ধান নেই হের ঝারাঝারি। ইয়েনিত্তুন দ আমার আক্কল বজেদে ধক।

আমি ইয়েনি গরি কি জাদঅ-আঝা পুরেই পারিবং? মূরত পুরি ভাবি চানা অক্ত অইয়ে। যেদক দিন যার, সেদক জাগুলুক বদের, আগাত্ত্যে অহ্র। জুম্ম জাদর কবাল পুজ্জ্যে। আমি কি জাদর ঘরপাদা চেই, না-কি নিজোর ঘরপাদা চেই? উজু কধা, জাদরে বালা তুলিবার চেই, না কি বাজেবার চেই? আ, যারা পর’-সিধুু বেজা যাদন, গাবুর গত্তন, জাদর ভালেত ন’ চাধন-তারারে ধাবেই দি, বংশ তুলি দি। আজল কধা, যারা ঠাগুর ন চিনি কারাগা সালাং গত্তন-তারারে তোগেই তোগেই বার গরি। তে, জাদর জধাবল গুনর কামত লাগেই, ঝাদি ঝাদি জুম’ বাক থুম গরি।

মুই কজলি গরিম, যারা জাদ-কাম গরির, তারা যদেবদে আমল দি, এগামনে কাম গরি যেই। জাদ’ কাম গুনর অহ্লে, বেগে বুক ডর গরি উযেবাক। আ-নলেন, আন্দারত ধান কুজিনেই লাব নেই। জাদর ইহ্য়ত বাদি গরি লাব নেই। গরিলে জদেবদে, ন’ গরিলে নেই। আমাত্তুন ঝাক্কো ন’-লাগের, বানা ইক্কো লাগেত্ত্যে। যিবে-লোই আমি জাদর মন’-আঝা পুরেই পারিবং, পিত্থিমিত জুম্ম চিন পেবং। আ, যারা জাদ’ কাম গরির, নিজোরে পুজোর গরি-আমি কি আলাজে গম কাম গরির? এ-কাম আ কধক ভিলোন, কমলে থুম অভ? হিল চাদিগাঙ-অ লোগাং আ  কধক ভিলোন গঙি যেব? মনতদুগে চোগ পানি বেই পরে।

আ, হুলুঙ-অ সেরে, আদামত, যারা উবো-তেন্যে পিন্যে, লেগাপরা ন’-পারন, তারাও দ কই পারন-কুবন গম, কুবন ভান্যে। দাগ কধা আঘেদে- আমনও আন্দাজ পাগলে বুঝে।  তে  আমি কিত্ত্যেই ন’ বুঝি? না কি ফারগ গরনি দারু খেইয়েই ? অম’হদ’, আমক অহ্ভার। ইয়েনি নগরি গত্তনাত কাঝি বানি নাতদি মলে¬্য-দ’ কন’জনে ন’ দেধাক। জুম্ম জাদ’ রিবেং পজা ন’ অহধ। আমারে মান্ন্যে বাইনি গত্তাক। আমি এধক পরাকবাল্যে! চোগ হাধিলে দেগে-আমা পুও-সা, নাদিন-পুদিন, কুধু থেবাক, কুধু যেবাক? তারার কি ঘরপাদা ন’ লাগিবো? না কি তারা আমা পাপ্পানি জনম্মো ভুগি ভুগি থেধাক? না কি তারা নিজো ভিদেত, পর’-মান্নোত্তুন ধাবা খেই খেই থেধাক?

আঝল কধা, আমি, আমা মনানি, ভারি কলি, চিগোন, নিজো মাধা ফেজা ন’ দেগি। নিজো জাদর ভালেদ ন’ চেই। জাদ’-কামত সঙ অই ন’-জানি, হাক্কে জাগুলুক বদি জানি। দাগ-কধা, অখ কধা কলে আমক বেজার, গরম ভাত দিলে বিলেই বেজার। আদিক চালাগে পদ’ পাজারাত আঘিয়। আমা মনত- অনঝুর, বাক্কে মনত যিয়েন নেই, শিয়েলে¬ মনত সিয়েন, ফুদি থাই। সেনত্যেই, আমি জাদ’ কামত বাক থুম গরি ন’ পারি।

লাজর কধা, আমি জাদর বংশ ধরি রাগেই ন পারি। দাগ-কধা, যে গাজত তলে জিরেই সে গাজ’ শিঙোর কাবি। যেন, আমা জুম্ম জাদর আগমুলিম পথ ফরেই দিয়ে-মানবেন্দ্র নারায়ন লারমা এল’, তারেও জাদর দারিদ-উনে, এহ্মান-উনে চুধো চুধো দালি দিলাক। জুম্ম-জাদত্ত্যেই নি-আলসি গরি, গুনর কাম গরি, বেঅক্ত-গরি জাদত্ত্যেই, পরান আহ্রেই পেল’। তারে দালি দিনেই, তারা কি পেলাক, কি অলাক? আ, তার পুও-ঝি-উনর দ’ কন’ উহ্ধিস নেই। তারাত্তুন বাব’ জাগা, জাদ-জাগা উদো লনা দরকার এল’। বাব’ বিদ্যে পুওই পায়।

আ, তা আজল আহ্ল ধরিয়ে, জ্যোতিরিন্দ্র বোধিপ্রিয় লারমা (সন্তু লারমা) ন’ থেলে-তা জাগাত আর কিয়ে নেই। তা ধোক্কেন, জাদ’-কামত জিংকানি বিলেয় দিয়ে মানেই-কন’দিন আর পেদং নই। তে ন’-থেলে জুম্ম-জাদর আর’ বল ভাঙিব। দাগ কধা-যার কামে যারে সাঝে, আর কামে লাদি মারে।

আ, আমার জাদর ধর্ম-গুরু, মহাসাধক বনভান্তে নেই-ইক্কে কিচ্ছু নেই। তা ধোক্কেন মহাসাধক ভান্তে জনমত্-ও জন্ম অধাক নয় আর। তারে আহ্রেনেই জাদর ধর্ম-মন ভাঙ্গে। জাদর চিত ন-ভিচ্ছে অইয়ে। আ, জাদরে চোক পহ্র গরি দিয়ে, প্রজ্ঞানন্দ ভান্তে,বিমল ভান্তে ন’ থেলে- তারা ধক্কেন দাঙর ভান্তে জনমত-ও পেদং নই। মোনঘর কলে কন্না ন’ চিনে? তারাত্ত্যেই জুম্ম-উনে বিদেজত পদ ফরেই পাজ্জন। একদিন আমি তারাত্ত্যে পোত্তে পেবং।

আ, আমা রাজা বাবু, ব্যরিষ্টার রাজা দেবাশিষ রায়, তে দ’ ইক্কো দেব-কুলো মানেই, তা ধক্কেন রাজা পিত্থিমিত কয় জন আঘন? আমা জাদর গিরোজ তে ন থেলে- তা ধোক্কেন রাজা জনমত পেবং ভিলি আঝা ন’ গরং। তে ন’ থেলে আমি ওল অহ্ভং, জাদর দার ভাঙিব।

এধক্কেন আমার জুম্ম জাদর, বর মানুষ আরও আহঝার আহঝার, লাখ লাখ এলাক, এজ আঘন। তারা পূও-সারে পুস-মানেই ন’ জানন, এগত্তর গরেই ন’ জানন। আ, কাম খেই ন জানন।  ইগুনে তেম্মাং-সুল¬ুক গরি, সং-সমারে কাম গরিলে, গোদা সংসারান জিদি পারিবাক, জুম্ম-জাদরে জিদেই দি পারিবাক।

মাত্তর, আমা জুম্ম জাদর, এ-দাঙর-উনর, আ বাব-মা-উনরও যদেবদে দুজ আঘে, ভুল আঘে। তারা নিজোর বংশ, জাদরে পালেই তুলি ন’ জানন, চেরেত্তা গরি ন’ জানন, বর দি ন’ জানন। অহলে সাদাঙা ভাবন। ধগে ন’-অলে উধুম-ধুমো গবন, অকধা কন। সেনত্ত্যেই, পূও-সায় বাবত্তুন জুদো ওন। দাগ কধা-বাব চা, পুত চা। বাব-মা গুদিয়ে পুও-সার দূগ-সুখ। বাব’-সিন্দি, এক্কেনা অলেও ঘাজন। কিত্যেই, সে ভুলানি ইক্কিনে আমাইধু ভাজি ভাজি উধের। এজ বরগাঙ সাজুরি সাজুরি কুল ন’ পের। দাঙর-উনর, মা-বাবর অভিশাপ না চিগন-উনর, পুও-সার অভিশাপ, কিজেনি? অম’হদ’, আন-উধোর লাগে।

কিত্তেই, দাঙর-উনে যুনি চিগোন-উনরে কির্ব্যে গরি ন’ জানন, পালেই ন’ জানন, তে কন্না পারিব? সেনত্ত্যেই, বাপ-পুদর, মা-ঝিওর, ভেই-বোনর তেম্মাং-সুল¬ক লাগে। কনে কদ্দুর বুঝে-তারালে¬াই জগা চা পরে। পোও-সারে মা-বাব’ কধা শুনন পারা, মানন পারা, গম তালিক দিয়ে পরে। তারারে ধগে ধগে কোই জানা পরে। দাগ-কধা-মুও গুদিয়ে বেঙ মরে। ন-অলে কিওর দুগ সারা সুগ ন এযে।

ইক্কি সালেন, জাদর আজল পিরে-আন কি ? কন জাগাত? না কি কিয়েই চালান দুওন? তগেই সুক পা পরিব, লগত-তগত দারু তালিক দিয়ে পরিব। জাদর পিরে আলেই যার, এ মাধানত, আমার রাজ বৈদ্যর এগত্তর গরনি তালিক দরকার। আ, নঅলে পিরেআন জনম বদলিবো। ঘোবা-বাদে থেই যেব-গোই।

নাঙে দাঙর অলে, কামে দাঙর ন’ অলে, জাদ’ কামত গুনর ন’-লাগিলে, সিবে দ’ দাঙর হলেই ন’ পারে। পুও-সায় কিত্যেই দারিদ ওন, উল্লে¬া গরন?  সেনত্যেই, আমা দাঙর-উনর, বাব-মা-উনর, আর’ নিজোরে তলবিজ গরানা অক্ত ওইয়ে। মুরত পরি ভাবি চানা অক্ত ওইয়ে। পুও-সায় বাবত্তুন কি মাঘন? পুঝোর গরানা, খবর পানা দরকার। আ, এক্কান কধা -চিগনই দাঙর। দাগ কধা, যে দিনত যে কাল, উরিঙে চুমি গেল বাঘ’ গাল। মিজে আর হাজা, অক্ত এলে, একদিন বাবত্তুন পুওরে ঘর’-সুন্দুক  গঝেই দিয়ে পরে।

আ, একদাগি এক্কেনা সের পেলে, পর’-মাধালোই, নিজো পেত তরেবাত্ত্যেই বঙপাদারে বেজা যান। নিজে নিজে দুগ গরি কামেবার সেদাম নেই, সেনত্ত্যেই পর’ সিধু আহ্দ পাদন।  জাদ’ বিজিরেআনি বার গরি দুওন। দাগ কধা-ঘর উন্দুরে বের কামারান। আ, একদাগি চোক ফেলে ফেলে, গাল মাধন, তারে তে তারে তে বাজেই দে-দি গরন। অক্ত ন’ অধে চেলা অহভার চান।এক কুগুরে ভাত কাদে -আ এক কুগুরে দেই ন পারে। তে মান্নোর জু অহ্য়, কমরত আহ্দ দি আহ্ঝি আহ্ঝি চেই থান, আমারে ফেজ গরন। জাদ’ কাঙেল ভাঙি দুওন।

আ, আমা গাবুজ্যে পুওসা-উনও কম নয়। মা-বাব’, গিরোজ’ কধা, ন’-শুনন। নিজো মনজক্কায় থেবার চান। বর জনর রহ্ ন’ মানন। বুজেদ’ চেলে বেজার পান। জাদর, সমাজর সুদম ন’-পালান। বর জনরে পাত্তা ন’ দুওন। ধাঙর-চিগন ন’ চিনন। মাধা ন’ ধারান, বর-জনত্তুন ন’ শিগন।। বাবে মাফ চেব’ না পুঅই মাফ চেব’ ? কন্না দাঙর কন্না চিগোন-ইয়েন বুজো পরিব’।
জাদর দুগ চেনেই, জাদর মু-চেনেই অ্ামাত্তুন চিৎ-পুরনা, সঙ অহ্না অক্ত ওইয়ে। সেনত্যেই মুই কজলি গরিম-সমাজ্যেলক, ভেই-বোন লক, পুওঝি-লক উজুু পত্থান বেঙা ন’ গরি, জিয়েন গরা পরিব’ সিয়েন গরিয়। উজু কধা, তুগুনো বাশ অহ্লে, দাগ কধা-গাজ’ মাধাত গুই হুরঅ ভাত খেই যা তুই।

আওজর বাব-ভেইলক, পাগানা লগে কাজা ফেলেই-কজমা কজমা ভেই-বোনর, কুজি কুজি পরানানি বেঅক্ত গরি কাড়ি নিনেই লাব নেই। পেদাপেদি আর নয়, জাদর ভালেদ চেনেই আমাত্তুন নিমোন ও-পরিবো। পাবে বাব-রেও ন’-সারে।  সত্য-লগে জিনিবার, সত্যরে লুগেবার পিত্থিমিত কিয়ে নেই। একদিন নয়, একদিন মিজে, জাদ’-সিধু মাধা লুঙি পেব’।

আ, ভেই-বোনলক যারা, তুমি জাদ’-কাম গরর, দোলে-দালে চিদে গোজ্জো, ভাবি চেইও তুমি কুধু যর? আন্দাজে কামাহ্ মাদান্দি ঝাম মারিনেই লাব নেই। ভাবি-চ, পদ কুবন উজু, কুবন বেঙা, কুবন ধুও, কুবন নিবিলি। নিজোর ইনেজেব নিজোর আঘে। পর’ কধালোই উবোল-ফাল, তিনেঙ-ফালাঙ ন’-ওয়ো। একদিন নয় একদিন পোত্যেবা। দাগ-কধা, এরা খেইয়ে বাঘ’ দরে চিৎ খেইয়ে বাঘ লাগত পেবা।

আ, আমা জুম্ম জাদর বাপ, লারমা, আমারে কি কয় যেইয়ে? লারমা, লারমা গরি, তা নাঙান, গুদি ন’-রাগের। তে একধক, আমি একধক। তারে বেগে মানি, নাঙ গিনি, বাইনি গরি। তুওদ তা ধগে ধগে ন-গরি, উল্লে¬া গরির। চুধো চুধো তারে বন্নাং তাঙেই দির। তা কধানি, গমেদালে কান্দ গল্যে, তে সালেন, আমি কিত্যেই এজ সং ইনে-ইনি গরির? দাগ কধা,বান্দররে কিয়ে পেল’ আলসরা। শিগেই যেয়ে এক্কান, গরির এক্কান। লুও-গরমত আমি কি গরির আমিও খবর ন’ পের। আমি কুরি-কান ওইয়েই। আমার চোগত মালা বান্নোন। আমি ফদাংতাং পহরত ওল ওইয়েই।

আ, আমা হিলো সেরে, আদামত গেলে দেঘে-ভুইবলা, জুমবলা, বেন্যে-বেল্যে দুগকাম গরি, এক-সাস ভাত গমেদালে সুগে খেই ন’ পাদন। তারারে চেরেত্তা গরিয়ে নেই। তারার পেত ফাদি যার, তুও মু ন’ ফাদের। ঘরবো ডর, ঝারবো ডর । সিত্ত্যেই, ডরাদে ডরাদে, ধাদে ধাদে-আমি পাদুরো, পরান-ইত্তুক, পেত্তোমরা ওইয়েই। ইন্দি গেলে সুন্জুক নেই-উন্দি গেলে সুন্জুক নেই। আ, টাওনত থেলেও-আমি জাদ কধা পুরি ফেলেই, ইধোত ন’ তুলি। জাদ’ কধা কলে বেজার বেজার ওই। জাদঅ কামত সাঙেত ন’ দি। জাদ ভেই ন চিনি-লুরো শুগোর চালত উধিয়।

আ, বিদেজত গেলে দ’ আর’ সিত্তুন বেচ। আমা জুম্মো-উনে, চাইনিজ ন’ অলে জাপানিজ হলান। পিত্থিমিয়ান অঝার পান, ধুও জাগাত ওল অনধোই। জাদরে স্ববনেও ন’-দেগন, আজল ঘরপাদা পুরি ফেলানদোই। পুও-সা- উনে নিজো জাদ ন’ চিনন। এনে এনে জুম্ম নাঙ লুগি যেই, বালা উধি যানদোই।

সেনত্ত্যেই নিজ’ ঘর কধা, পররে কইনে, পররে গবিনেই লাব নেই। আগে নিজে হুদো দর’ গরা  পরিব’। চুধো চুধো বল ন ফেলেই, জিংকানি পাদারি ন’ গরি, নিজে নিজে জধা অহলে, যমে, ভূদ-দেবেদায়ও দোরেবাক। ইয়েন-ওই আজল রাজ বৈদ্যে দারু তালিক। আ, ন’ অলে চুধো চুধো জাদরে ওল গরি লাব নেই।

সেনত্যেই, আর চালান দে-দি নয়। ঘুবোঘুবি নয়। ইয়েনি যেধক বেজ অহ্র, সেদক আঘাত্ত্যে অহ্র। চাত্যেই ন’ পারির। কেনাকেন্যে-ল কনদিন আমা জাদর হুদো ডর ন’-অহভ। লদক-ধদক ওই-উগুরি যেব’। এধক্কেন সারানাধা ওই, ধেবাতালা ওই, সিলোত তলে কাঙারা ওই, থিদে নেইয়ে গরি আ কধক ভিলোন? মনে কয়, জুম্ম জাদত জন্ম ন’ ওইনেই-পর জাদত জন্ম অধং মনত সুগে থেই পেদং। কধা আঘে, মানুয মানুযত্তেই- জাত জাদত্তেই। পরান থেলে পরানবলা অন, মাত্তর, মন ন’-থেলে মানুয ন’-অন। ইয়েন-দ মন’ কাম, নিজো কাম। জাদর ভালেদ অহ্লে-নিজোর ভালেদ অহ্য়।

আমার এ কধানি মুরত গরি চিদোত ন ফুদে কিত্তেই? মাধাত ন’ এযে কিত্তেই?

আমা ভালেদ কি ন’ এব’, কনদিন ন’ অহ্ভ?  সালেন, গোদা জিংকানিত কি আমার বানা দেবাকালা, ভুজোল আ বরব বেই বেই থেধ’ ?
আমা নাঙে কি কনদিন পুগ বেল ন’ উধিবো, বাপ-ভেই লক? কনদিন আমা কবালত ঝিগেফুল ন’ ফুদিব’, মা-বোন লক?