নিজোরে আক্কে সোওর গরি

- চাঙমা ত্রিপন তেইয়া

                        আমা চাঙমা জাদ’ কধা কহলে, চিগোন-গুরো পজ্জন শুনে পারা, ভালুদ্দুর। মাগ’রগ-ত্তুন আচ্ নীঘিলে পারা, হারা থুম ন’ অয়। চাঙমা জাদ’ বিজগ, এচ্চে কয়েক-শত্ বজর বিদি গেল। কহ্ন, মুগল আমলত্তুন ধরি বৃটিশ, পাকিস্তান আ বাংলাদেশ আমল সং। এধক-ভিলোন সং, তুওদ’ কন’ ভালেদির গঙার দেগা ন’যার। বাংলাদেশ আমলত্ পরিনেই-ও এয’ সঙ, আমি দুঘোর-জিংহানি কাদেই উদো ন’পের। এব’ আনউধোর-গরি, ইত্তুক-ইত্তুক পরান্দোই বাজি আঘি। কধক ঝর-বোয়ের, দেবা-কালা সেরে সেরে, জিংহানি লারেই গরি, এত্তে-এত্তে চাঙমা জাদ’ নাঙ এয’ সং পিত্থিমিত-বুগত্ লিগি ন’পারির। সিত্তেই, চাঙমা-উন কদ্ধুর ভালেদ অহলং-ন’অহলং, ম’ মনত্ উধে আ পরে। আমক গরি, মূরত পরি ভাবি চাং। মনে মনে, আমক-গরি ভাবনা-রেজ্জোত্ এক্কান এক্কান-গরি তোগেই চাং।
পিঝোর গরা এযে, আমি চাঙমা-উন আগেন্দি কে-ধক্কেন এলং, কেনজান এলং? আমি কধক কাম্মো এলং, আ কধক আলসি এলং? আ, গরাত্তুন-ধরি ইক্কিনে কেনজান আঘি। আমি পহল্ল্যেত্তুন-ধরি ইদ্ধরোত এনেই কদ্ধুর  ভালেদ অহ্লং? আমি যুনি কাম্মো অহ্লে, সজাগ অহ্লে, চেদন থেহ্লে দ’ এয’ ইদ্ধুরোত পিজে-পরি থেবার কধা নয়। ভালেদ অহ্লে ইদ্ধুরোত দ’ এয’ আধতুবো ওই থেবার কধা নয়। চাঙমা-জাদর পয়দ্যানে, আমা বুরোবুরিউনে-ও নানান বাবত্তে গম-বজং দাঘ’কধা কই এচ্ছোন। জাদরে বাইনি গরি এচ্ছোন। চজ্জে চজ্জে-ও এচ্ছোন আ গবিও এচ্ছোন। সেনত্তেই, এয’ সং আমি নিজোরে নিজে গম কই ন’ পারির। আমা বুরোবুরি কধা; “চাঙমাউন সং নেই, পাল্লাত-তুল্ল্যে বেঙ।” একদূরত্তুন রিঙি চেলে, গমানিত্তুন বজঙানি-বেচ্ চোগোত্ পরে। এহ্নেও, আমা চাঙমা-জাদ’ বিজগ অম’কধ’ সেদাম-সারা এল’। কন জাগাত্ আমি থিদে ওই ন’পারি। আমা বিজগ’ কধা, শুন্দে শুন্দে পেগাত্তে অইয়ে। দুগো-কাল’ কধা শুন্দে শুন্দে, কাআন ঘা অইয়ে। চোগ হাধিলে দেগে, আমি আগে কুধু এলং আ ইক্কিনে কুধু আঘি।
এয’ আমারে আমি বেরেই-বেরেই কোই, চাঙমাউন কুত্তরি, পেজাল্যে আ জাগুলুক্কে। যিন্দি যান সিন্দি দযান। ইন্দি গেলে ন’ আদন, উন্দি গেলে ন’ আদন। আমারে আমি চিগোন বানেই্, ফেজ গরি, বিজ দেগি আ গবি। আমা বিজিরে-নি আমি গাই গাই বার গরি। আমারে আমি বজং ভাবি, বিচ্চেস ন’ যেই। আ আমি কামত্ অম’কধ’ আলসি। এগামনে দুক্কাম ন’ গরি। আদাম বেরে-বেরেই থেই। দুজ কারেলে হাম ন’হেই, তারে-তে তারে-তে বাযেই দে-দি গরি। উজু কধায়, চাঙমাউন জাদ ইযেবে এয’ সং, গুজ আলঘা, চেদেরেঙ্গে, চিদেচজ্জা নেই। ইয়েনিত্তুন কিয়েজ গল্ল্যে, নাগ-অজল গরি, আমি কোই পারি-চাঙমাউন যিদ্দুর ভালেদ অহবার কধা সিদ্দুর ভালেদ ন’ওই।
                            মুই ইক্কে, যিয়েন ফগদাঙ গরিবার চাঙর, সিয়েন অলধে চাঙমাউনর নানান-বাবত্তে চলন-ফিরন, চিদেচজ্জা আ মন’ কধা। জাদ’ পেঝা, দজ’ পেঝা, গিরিত্তি-সুদম, গম-বজং,থাগয়ে-নেইয়ে কধা। তেক-কত্তা দিলে, পিত্থিমিত্ গোদা চাঙমা-উনর গম-বজং, সুগ-দুগ’ কধা হুলি কহবার চাঙর। চাঙমা-উনর কি কি উনো আঘে, কি কি ভান্যে আঘে? আমাত্তুন কি কি সোওর গরা-পরিবো, মুই সিয়েনি এক্কান এক্কান-গরি মন’ভিদিরেত্তুন নীঘিলেবার চাঙর। হালিক, ইয়েন’ পয়দ্যানে, মুই সিদ্ধুর পুদি-পুদি ন’কোইনে, মুলুক মুলুক গরি কোই যাঙর। এ-পিত্থিমিত্ নানান দেজত্ ভালক জাদ আঘন। তারা চেঙেরানি, কনে কন-ধক্কেন, এক দূরত্তুন পরাক পরাক গরি দেঘে। জাগাত্তুন আমি হবর পেই কন-জাদে কুদ্দুর উগুরে-তলে আঘন।
 আমাত্তুনও তারাল্লোই তোলেই-চা পরিবো, সং-গরা পরিবো। সেনত্তেই্, এ-মাধানত্ আমি কদ্ধুর ভালেদ অহলং ন’অহলং, কদ্ধরু উগুরে উধিলং, কদ্ধুর তলে লামিলং, তলবিজ গরানা অক্ত অইয়ে। চাঙমাউন আমি কনকিচ্ছু, বানা উগুরে-উগুরে দেগি, মনদি দোলেদালে ন’দেগি।
নিজোরে চালাক, জ্ঞেনি মনে গরি। মাত্তর, পররে ভুল, কিচ্ছু ন’জানন, ন’পারন মনে গরি। নিজো মাধা ফেজা ন’চেই পর’ মাধা ফেজা দেগি। উন্দি চেলে, আমি নিজে অঘা, নিজোর সেদাম নেই, পররেও সেদাম নেই মনে গরি। আদিক চালাগে আমি পানিত্ বুর-মারি আহ্ঘি। আমা মনত্ নানান বাবদর কানাকুত্তরি আঘে। আমি মান্নোরে, আপাদাচ্চে, বিগিদি গরি, চলাচলি গরি আ রজনা গরি। কিত্তেই, আমি ইক্কো মানুয ধকপাচ্চন ন,অহলে, তারে কই, “ ইবে উঝু তিবিরে ধক” আ ইক্কো মানুয এক্কা কাজর, করলা অহলে তারে কই “ইবে উঝু কুগি ধক”। আ, মাত্তর ইক্কো মানুয ধগেধাগে অহলে, পহ্ন রাঙা অহলে, তারে কই “ ইবে উজু ধগেধাগে,আমা চাঙমা ধক”। 
            ইয়েনিলই দ’ বুঝো যায়, আমা চাঙমা-উনে, বানা নিজোরে নিজে গম আ দোল হোলান। আ মিজে নয়, মান্ন্যে আমারে গম কহলে অমকধ’ হুঝি ওই। আ, আমি হাক্কেনে মানুয বিচ্চেস যেয়। মনত-দিলত যা আঘে বেক্কানি হুলি দেগেই। মন’কধা হুলি কোই। মান্নোলোই হাক্কে সং-পরি, পরান দূওয় হাবেই। মান্নোর মিধে-মিধে, নাগর-নাগর কধালোই গলি পরি। আ আমি হাক্কে, তারারে কোচ-পেই, দোল-দেগি, মনত্-পরে, যারা আমারে বিজ দেগন, আমারে ঘিনান। ধগেনলে, আন্দাচ্চ্যে উদিচ ন’পেয়ে-গরি মান্নোরে গম-ভান্ন্যে মনে গরি।
আমা চাঙমা মিলে-উনেও দ’ গোওয়-ধরি সমত্ হেই ন’পারিবাক। দাঘ’ কধাঃ বাঙাল ছাগল। পর জাদ’লগে মিজি ন’ পেলে, কধা কোই ন’পেলে, চিৎ ন’ভিজে। চিকচিক্যে পান। চুর-গরি অহলেও পরমান্নোলোই, মিজিবার চান। চলাচলি, বিগিদি গল্ল্যেও ওভলা আদাম পরন্দোই। পরান সোতফত্ত্যে অহ্ন। রাঙাকালা স্ববন দেগন। পিত্থিমিয়ান ঘিলে পারা দেগন। এক্কা জু পেলে, সং পত্তে পত্তে, ফুরুত-গরি লাঙনি ওন্দোই। মানা গল্যে বেজার ওন। পিঝোর গল্যে, মলেও হাম্ ন’হান। এ সেরেন্দি আর’ মা-বাবেও বল দূওন, তারা ঝি-উনরে মাধা উগুরে তুলি, ওঝেই দূওন। ধগে নলে, মুরে মুরে গজেই দূওন। আমা মিলে-উনে এক্কা মাহ্ঝন আ লেগাপরা পাল্ল্যে, কধক দগ্ দেগান। নিজো জাদরে অগুনর, অঘা মনে গরন। নিজো জাদ’ ভিদিরে জামেই মিলেই ন’পারন। জাদ’ ভিদিরে নেক-তোগেই সুক ন’পান। বেজ বুজেলে, গজাং মারি উধোন। ধগে নলে জাদত্তুন নীঘিলি যান। জাদ’ শলং বদলন। তেহ্, মিলেউনর জাদ’ইধু কাম কি? জাদত্তেই গুনর ন’লাগিলে, মাগানা-মাগানা কিত্তেই সিদ্ধুর লেগা শিগোন? লেগাপরা দ’ আক্কল-জ্ঞেন জুরিবাত্তেই। মাত্তর, মিলেউনে যেন্ জাদ আ মা-বাব-ওই উল্লো গরন, সেন্ বালা সুজোও হান। ইহ্ল মরে-সং ধজা হান্দোই, আধামরা অয় সং, পিদে হান-দোই। তেহ্, মনে মনজক্কা গরি, ফলনাদাগি তারারে মারে ফেলান। ন’অহলে, এমান’ ধক্কেন বেজা হান, সেনে সেনে ভঝ যান-দোই। তোগেলে মাজারাও সুক ন’পায় আর। আ আমা চাঙমা মরত্তুনও মিলে-উনত্তুন বেচ্ অঘা, সেদাম ছারা। চোক লাম্বা। কি কাম গরিবাক, তোগেই সুক ন-পান, চিলেং তিগতিগ গরি থান। গুজ আলঘা। দুক্কাম’ চিদে নেই। ভাদ’ চিদে নেই। পিজে-মুজুঙে চিদে নেই। জাদ’ চিদে নেই। মোক-পালেবার সেদাম নেই। মিলেউনরে বুঝেই ন’যানন, ভুলেই ন’জানন। বানা মিলে কুত্তুরি, রমচক্র-আনি ভাজ্।
মোক-পুও-র চিদে নেই। মোগো-উগুরে হেমদেম, কারবারি। সারা জিংহানি মদ হেই হেই থান। জু-হারা হেলন। পেলেও হেই ন’জানন, অগলে সঙ পুনে-মুওয় হেবার মনে কহ্য়। তেহ্, মদে জু-হারায় আমারে গিলি হাই। সেনত্তেই মিলেউনে আমারে কোচ ন’ পান, হিয়ে ন’গরন।
মরদ অইনে মরদ’ কাম ন’ গরি। মিলে-উনরে পালেই ন’পারি। মিলে-উনরে বুজেই ন’জানি। আ গাবুজ্জ্যে মরত্তুন-ও হেই।্ কারত্তুন কিয়ে কম নয়। মাবাব’ দুক্কানি ন’বুযন। বুরো অহয়-সং মা-বাবত্তুন তেঙাপোজে মাঘন। মা-বাব’রে পেরাদে-পেরাদে উরোন গরান।
ইয়েনিলোই দ’ আলগে বুজো যায়, চাঙমাউন কধক-গম, কধক-বজং। আমি চাঙমাউন পুনোরগ ছিনে-সং গব-দি পারি, মান্নোরে কোজ্জ্যে বাঝেই দি-পারি, মান্নো-কধা বোই পারি, পিজুম গরি পারি। মিলেউগুরে কারবারি ওই পারি। জাদ’ সিধু সদর ওই ন-পারি। আ এক্কেনা ধাঙর অহলে, বাবু অহলে, এগাদাত্তে ওই, জাদ’ লগে মিজিবার ন’ চেই, সদর অহভার দিদ্দেরি পেই, জাদ’রে পুরি ফেলেই। আ, এক্কান দোল কধা, যারা বর-বর চাগুরি গরন। সরকারি চাগুরি পান। তারা বেচ জাদরে পুরি ফেলান। জাদত্তেই মাধি ন’ পারন। আ যারাত্তুন চাগুরি নেই, তারা দ’ বেজা ন’যেয়ে ছাগল’ ধক। তারারে কিওই পাত্তা ন’দূওন।  জাদত্ ফাগত্ ন’ভরান। তেহ্, তারা আদিক-মনতদুগে কিচ্ছু ন’গরন। জাদ’ কামত পাদুরো গরি থে-পান। আ, যারাত্তুন চাগুরি নেই, নেইয়ে, তারারে কুগুরেও ন’ভুগন, তারারে মুনিচ্চর ভিলি মনে ন’গরন।
আমি যেদক লেগাপরা গরির, উগুরে উধির, সেদক-বেচ্ জাদরে পুরি ফেলের। পুও-সার চিদে ন’গরির। যেদক লেগাপরালই ধাঙর ওর সেধক মন চিগোন ওর। আমা মনত্ আন্নোয় ধজ্জ্যে, আমা কিয়েত্ ঘেরেং বান্ন্যে। জাদে’ দুগত পলে কাইকুরেও ন’ ঘোনেই। আমারে আমি ন’ চিনি। জাদত্তেই চোগোপানি ন’ ফেলেই। আমি হবর পেই, পুরোনি আমলত্ আমা বুরোবুরি, আজুপিজু-উনর গভীন কোচপানা এল’ দোয়েমেয়ে এল’ মনানি ধাঙর এল’। হানাদানা বেক আলাঝালা এল’। যেদক দিন যার সেদক আমার জাদ’ কোচপানা, দোয়েমেয়ে আহ্ঝি যার। মনানি চিগোন অর, ফারগ ওই যার।
আমাত্তুন এয সং ভালক্কানি উনো আঘে। আমা লেগাপরানি জাদর গুনর কামত্ লাগেই ন’ পারির। ঘরবো সিধু, দজ’ সিধু, দেজ’সিধু আমা লেগাপরা অগুনর। কিত্তেই, যারা আমার লেগাপরালই ধাঙর ওইন-তারা দ’ আমারে কিচ্ছু দি যেই ন পাত্তন।্ তারা নাঙে ধাঙর অলেও জাদ’ সিধু কামে ধাঙর নয়। জাদ’ পাপ্পানি বুগি-বুগি আঘন। আমার ইক্কে ধনে কুলেলেও মনে ন’কুলর। যাত্তুন আঘে আদেই ধন আঘে, ন’ফুরোয়। আ যাত্তুন নেই বুগত দিবার-ও নেই। একদাগি, ঝারে ঝারে আলু কুরি হেই-পাদন। ইক্কো জাদ কেনে জেদা থায়, কেনে ভালেদ অয়? আমি কনদিন মুরত-পরি চিদেগরি চেই-নি? কনদিন এক-সমারে কো-কি গোচ্চেই নি?

আ, আমা চিগোন-উনরে, নেইয়ে-নাদংসারা-উনরে, কন্না চেরেত্তা গরের? আমা হিলো-ছেরে, আদামত্ গেলে দেগে, চিগোনগুরো-উন পেত্তো হুলুং, হেঙেদা, আহ্রঙ-হাত্তোং, গাল-চিদিরে, পেত-চিদিরে, ছিগোন নাগ। ভাদ’ রাত, হেবার নেই। তেঙাপোজে নেই। উরোন-পিনোন নেই। ডাক্তরর চেরেত্তা নেই। গম লেগাপরা নেই। গম বুঝিয়ে, উজ দিয়ে  মানুয নেই, গম ঠাগুর-কিয়োং নেই। মোনে মোনে, জুমো জুমে জিংকানি কাদান। সিনে-সিন্যে গরি, কাররেকিইয়ে লাগত্ পা-পি নেই। হবর পা-পি নেই। আহ্র ভাঙা দুগকাম গরি, গাবুর গরি, কাত্তন-গরিও নিজো-পেত্ বাজে ন’পাত্তন। অমকধ’ চিৎ পুরে পারা। ইগুনরে আমা থাগয়ে-বাবুউনর ফেলাচেলা-আনি দিলেও হেই বুরে ন’এলাক্কুন।
   আলাঝালা-গরি চলি পাল্লাক্কুন।আমি এধক ধঝা হেলং, পোরা হেলং, বরপরঙ যেই পেলং, দুগ পেলং, শরনাত্তি ওই পেলং, গাবুর গরি পেলং, উবোজ থে-পেলং, বেঅক্ত-গরি জাদ-ভেই আহ্রেলং। তুওদ’ আমার এব’ কন’ চেদন নেই। সজাগ ওই ন’পারির। তুওদ’আমি নিচিদে, শনমরা। আমি নিজোরে নিজে সোওর গরি ন’পারির। যে তেন্যেপিন্যে চাঙমা সে চাঙমা। বারেত্তুন চেলে কেদাফল, দোকদোক্ক্যে রাঙা। ভিদিরে হেই চেলে কাত্কাত্তে তিদে, এক্কাও সুয়োত্ নেই। এনেও, আমা মনত্ পরসাল্লোয় ধচ্ছে।
    আমা মনত্ আন্নোয় ধচ্ছে। আমি এয মনানি কাযেই ন’পারির। জাদ’ নাঙে মাধা-উন গুনর লাগেই ন’ পারির। আমি এয’ জন গদে গদে, গাই চেলা গাই শিং। এয’ পরানত্ ন’ ফুদের, আক্কল ন’ বযের। দিবে-গরি চাঙমা সিগুনও, এয’ সং এগত্তর ওই ন’ পারির। ধাঙর-উনে, চিগোন-উনরে তুলি আনি ন’পারির। বেগত্তুন মনতদুগ’ কধা অহলদে; গুরুঠাগুরুনে শিয্য তুলি ন’পারির। লাগত-পা-পি নেই। অঝার জেনারেশন গ্যাপ। আমা কামানি এয’ সেত্তেরা-গরি জাগুলুক বদি আঘে। কুবন কক্কে গরিবোং কোই ন’পারির। আমার কি-আঘে কি-নেই সিয়েনও কোই ন’ পারি। আমি জাদরে এক্কাও উজন্ন্যে নি-ন’পারির। আমি জাদ’ ধর্ম কাম ন’গরি। আমি কামেই ন’জানি, হেই ন’জানি। এক-সাচ্চে চিদে গরি। আ এক্কা বুরো অহ্লে কাম ন’ গরি। বোইদে বোইদে হেই। পুও-সা ধাঙর অহলে, পুদো-বৌ আনিলে আহধ-ঠেং ন’ চলে, ছলনা দি। নাদিন ধুলেবারও আলসি গরে। আ, দেগা যায়, এক্কান ঘরত্ ইক্কো-গরি তেঙা কামেয়ে, মাত্তর তা-লগে বোইদে-বোইদে একতাল হেইয়ে। এনেও, আমি দুগ-গরি ন’পারি। মাগানা পেবার-হেবার চেই। আ, মনদি গম-লেগাপরা ন’গরি। নাঙে লেগাপরা মাত্তর কামে নেই। কিত্তেই, নরম লেগাপরা, চিগোন-জ্ঞেন, চিগোন-মন, জাদরে দুগ-লাগাই, জাদরে বরবাদ নেযাই। আ ডরমর’ গম-লেগাপরা, গম-জ্ঞেন, ধাঙর-মন, জাদরে ভালেদ গরে, জাদরে বাযেই রাগায়। আমার যিগুনে মাঝন আ ধাঙর, তারা নেইয়ে-উনরে তেঙাপোজে-সম্বল দি-পারন। সেরে-কুনেদি, মনে কহলে, পালেই পারন। কিত্তেই, ইক্কো যুনি নেইয়ে-নাদংসারা থেলে, তালগে আর’ তা পুও-সা, নাদিন-পুদিন বেক্কুনে নেইয়ে-নাদং-সারা অহভাক। আ, ইক্কো যুনি অঘা অহয়, তা-লগে আর’ সাগর অঘা অহভাক। সেনত্তেই, আমা ভিধিরে ইক্কো মানুয বরবাদ-যানা মানে জাদত্ হুরো-পিরে ধরানা। তেহ্, পিরে আলেবার আগেন্দি, আমাত্তুন পিরেআন গম-গরা পুরিবো। ইয়েনি আমা চেলা-উনো, বাবু-উনো  মাধাত্ এক্কাও এযে না ন’এযে কিজেনি? এক্কেনাও গুত্তে লরে না ন’লরে কিজেনি?                
আমাত্তুন ভালেদ অহভার চেলে, আলত্তে কাম্মো উ পরিবো। বেগত্তুন চেদন থা-পুরিবো। কামত্ সজাক ও-পুরিবো। থাগয়ে-নেইয়ে রেগা-বানা পুরিবো। পুও-সারে গমে পালেই জানা পরিবো। পুও-সারে চেরেত্তা-গরা পুরিবো। কিত্তেই তারা অহ্লাক্কে আমার জেরবো। তারা জাদর বাব। সেনত্তেই আমাত্তুন জাদর গমত্তেই চিগোন-দাঙর ও-পুরিবো। জাদ’ কামত্ মনানি এক ও-পরিবো। মাধা ধারেই, অক্ত-মুজিম দুগ-কাম গরা পরিবো। তেঙাপোজে কামেই, বরগত্ গরি জানা পরিবো। আয়-থাক্কে বুঝোবুঝি ও-পরিবো, তেম্মাংসুল্লুক গরা-পরিবো। ইক্কিনে, আমা চাঙমা-উন, সাংপোজ্জ্যে ভাঙা আলগ-ঘর’ ধক। ঘর’ মুর হাম-উন, উই পুগে হেইওন। লদক-ধদক অইওন। থবাক ওঝোরি যেইওন। ফিবেক নেই। কেদাকতুক নেই। বেরচাগা নেই। চানাত্ চাজা নেই। ইজোরত্ কাঙারা কেম্ নেই। দমদমা নেই। চালত্ শন নেই। এব’ তেনামেযা-গরি আঘে। এক কিত্তেন্দি সোওর গরিলে আর’ এক-কিত্তেন্দি ভাঙি যায়। সোওর গরি ন’পাজ্জ্যে। যিন্দিত্তুন পায়, এফুর-ওফুর গরি দেগা যায়। আমাত্তুন ইক্কে ধামানা-বের বেরিবার অক্ত অইয়ে। মুর-হামুন বদলি দিবার অক্ত অইয়ে। নূওগরি দোলে-দালে তুলিবার অক্ত অইয়ে। ইক্কিনে আহধা-আত্থে ঘর’ জায়-জুক্কল, বাজ-গাজ থুবেবার অক্ত অইয়ে। আ, নলেন সারা জনম্মো ভাঙা ঘর’ ধক লদক-ধদক-গরি থে-পেবং। বরব’ ভুঝোল বেই, আহ্লে পরিবো, ভাঙি পরিবো, উরেই নেযেব’। তেহ্, বেক্কুনে ঝাবা হেবং। রুক্কে অহভং, আর নীঘিলি ন-পারিবোং। এয’ বাব-ভেই-মা-বোনলক আ গাবুজ্যে-গাবুরিলক, জন গদে গদে, নিজোরে আক্কে সোওর গরি। নিজোরে  কামত্ গুনর-লাগেই। কামানি এক্কান-এক্কান গরি তোগেই বার গরি। কামানি ভেইল্ গরি। ঝাদি-ঝাদি কাম’ বাগ্ থুম গরি। তেহ্, গাই গাই, জাদ্ সোওর অহভ’, জাদ্ ভালেদ অহভ’, জাদ’ মনজক্কা অহভ’।