মুই জুমবলা-জুম্ম, জুম ছাড়ি কুধু যেম?

চাঙমা ত্রিপন তেইয়া

জুম কহ্লে-মনান কে’জান গরে! পরান কোজলি গরে। ইধোত্ গরি পারং ধরি, মুই শুনি এচ্ছোং আমা বুরোবুরি, আজুপিজু বেক্কুনে জুমবলা এলাক। সারা জিংহানিয়ান জুম গরি গরি মনত্সুগে কাদেই যেইয়ন। জুম ছারা তারা কিচ্ছু ন’ বুঝোন, ন’দেগন। মোনে মোনে, দাবে দাবে, অঘুর তারুম, আগাব ভুই তগে তগে, বঝর-বায়ানে জুম ফাং গত্থাক, জুম কাবিদাক।
সে বুরোবুরি আমলত্তুন ধরি, আমা আজুপিজু-উনে বেরেই বেরেই জুম হাদে হাদে ইক্কিনে যিয়েন লংগদু, হারিকাবা ক’ন, সিত্তুন ধরি জুম তগেই তগেই যাদে যাদে উরিঙে মোন ফারি উরিঙে চাগালা, উরিঙে জুমচাবত্ হ্লুঙ্ঘোন-দোয়। এ উরিঙে মোন’ ধক্কেন অজল, উবো মোন আর নেই-দেলে ডরগরে, আন-উধর লাগে। এ উরিঙে কুল’ কধা নাঙ ঘিনিলে মান্ন্যে উ-উরি উধোন। উরিঙেত্ থাক্কে থাক্কে, তেহ্ সিত্তুন ধরি আমা আজুপিজুর শিঙোর-পাগোর-পুও’সা, নাদিন-পুদিন, এয’ সং আমি উরিঙেত্ আঘি। সেনত্তেই ইক্কি আমি উরিঙে কুলে ্য নাঙ হোলেয়। এয’ সং বাব-ভেই, হুত্তো, মলে ্য আ জেত্তা জুমবলা, জুম গরন। মুক্কধা, আমি গোদা ঘরবো আ আদাম্মে-উনে জুমবলা কহ্লে সাজে।
জুমো কধা কই ন’পেলে, জুমচাব্ বেরেই ন’পেলে, জুমবলার পেদ’-ভাত ক্ষয় ন’যান, দিন ন’কাদে। জুমবলা-উনে, বেন্যে পোত্যে ঘুমোত্তুন উদি ভাত মজা-লই জুমোত্ যেদাক। গোদা দিন্নো জুম’কাম গরি বেলে ্য অহ্লে আদামত্ ফিরিদাক। আলগ ঘরত্ চানাত্ আ ইজোরত্ বজি এগত্তর অধাক। মালা শুগর কাবি এহ্ রা আ শিয়েমা হাজি বানেয় দ’চুনি-লই গুল গরি বোঝিদাক। হাদে হাদে মাত্তলে ধরি আহ্লাং-উলং গরি  নাজিদাক, উবোগীত্ গেধাক। জিল সেজেরে সেজেরে কধাক-এচ্চে মত্তান ভারি দ’গ অইয়ে। হানা ইহ্ল অহ্র।
আ’ চলি চলি কধাক-এক্কা হেই ন’পেলে ঘেস্সে আহ্র হরা শুল্য়ো, পরানে মাঘে, দিন ন’কাদে, কিয়ে পিরে সোর ন’-অয়। আ, আধিক দুগত্ এক্কা হেই পেলে, মনত্-দুক্কানি কাদি যায়। আর’ নূও গরি কিয়ে বল ভরে। দুক্কানি পুরি ফেলা যায়, কিয়ে বল-পেয়ে লাগে। রেঙো চাগে, আধিক যোলে আদামান উম্ লাগে’, উস্সো গরে’। অক্তে অক্তে জুমো গব্ দেদে দেদে পোত্তে আমল পরি যায়। গোদা রেত্তো পহ্র গরন।
মাত্তর, তারা জুমবলা ন’ অধাক, জুম ন’গরিদাক, সেক্কে তারা ইধু কেনে পরান বাজেদাক? জুম ন-অলে তারা উবোয় ছারা। পিত্থিমিত্ কন’কিত্তে কন’ জুমবলা ন’থেদাক। মনে মনে কহ্ং-আমা আজুপিজু-উনে যুনি জুমবলা ন’ অধাক, মুই ইক্কি জুম্ম ন’ অধুং, জুম্ম হোলেয় ন’ পাত্তুং। আ ন’লে ক’ন এমান’ কুলে জন্ম অধুং, ন’লে ফারাঙি সাহ্ব অয় পেধুং, জুম্ম নাঙ লুগেই পেদুং।
সেনত্তেই মুই, আমা আজুপিজু-উন’রে, কি কইনে, কি দিনেই তারারে হুঝি গত্থুং-মুই হবর ন’ পেধুং। ইক্কি তারা আঘন্ স্বর্গত-আমি আঘি নরগত্ । তারা কি’য়ে এহ্রা, তারা লুও, তারা চিদে-চজ্জা-মর সর্বাঙ কিয়েত্ রগে রগে, শিরেয় শিরেয় ছিধি আঘে। সিত্তেই দ’ মুই নাক অজল, বার গরি কয় পারং-মুই জুমবলা-জুম্ম। মুই জুম্ম ওয় ইধু বাজি আগং, বাজি থেম্। জুম, জুমবলা, জুম্ম,- এ কধানি এহ্নে বাদে আদেই ন’এযে। ইয়েনি গাজত্তুন অহ্লা পোজ্জে পারা নয়। জুম্ম, আমা জাদর আঝল নাঙ, ইয়েন ন’ কলে, ন’ দাগিলে, সমত্ ন’ দিলে-আমাত্তুন গম ন’ লাগে, আমারে ন’ মানায়, আমারে আমি চিন্ ন’ পেই। জুমবলার- জুম্মর পুরন’ কধা, বিজগ’ কধা, দুগ’ কধা, আজুনানুর পজ্ঝন শুনিলে-বুঝি পাল্যে-আমার পরানত্ ফুধে, বুক ধিবে দিয়্য যায়, কানানি এযে, চোগোপানি বেই পরে। আমি জুমবলা-জুম্ম কিনেই দ’ আমি আমা আজুপিজু-উন নাঙ ঘিনি, চিৎ পুরি, ইধোত্ তুলি।
জুম মর জিংহানি, জুম মর পত্তম, জুম মর স্ববন, জুম মর কোচ্পানা, জুম মর আওজর সর্দ মা।জুম নি’নেয় দ’-জুম্ম, জুমচাব, জুমো ঘর, জুম চাগালা, জুমো তোনপাত্, জুম্ম মরিচ, জুম্ম ধান, জুম্মো বিগুন, জুম্মো শিলুম, জুম্মো বর্গি, জুম্ম ভাত, জুম্ম তাগল। জুম্মত্তুন দ’-জুম্মবি, তান্যেবি, রাধামন-ধনপুদি, রান্যেবি, ধুদুক শিঙে, হেঙ্গরঙ, উবোগীত, গেঙহুলি।জুম্মজাত কিনেয় দ’- বিজু, মদ-জঘরা, কাঞ্ঝি, মালেয়ে, কোজোই পানি, থানমানা, মাধা ধোনা, ধান ফাঙ গরানা, মান্যে শিরেনা, ভাত-জরা দেনা, মা-লক্ষিমারে ভাত দেনা।
চিগোন থাক্কে, আমি জুমত যেবং কলে হুঝি অধং, হিজেহিচ্চে গরি জুগুলেদং। কিত্তেই, আজু-নানু, মাহ্-বাহ্, দাদা, বেভেই-লগে জুমত্ গেলে-পেত্ ভরন্ হেই পেদং-নূও জুমোর হ্মামবারা, চিন্দিরে, বিনি ভাত, কোন্ ভাত, কেজবিজি ভাত, বিনি মোক্কে, সিমেই আলু। আ, সে-লগে হেই পেদং- পুত্তিংগুলো, সোরবেক গুলো, কুজুমগুলো, এহ্রে-গুলো, এহ্ত্তোল বিজি, বরাগুলো, ঘেরে আম, নলাম, পকপক গুলো, বত্তাগুলো আ চামনি কাত্তল। আ, জুমো মুরুঙত্, তানজাঙ’ ধুদুগত পেদং-মোন কাঙারা, জেত্ কাঙারা, হ্মোঘোয় কাঙারা, দাঝ্যে ইজে, উগল মাছ, নারেই মাছ, সেলজ মাছ, গুদুং মাছ, নাবালাং মাছ আ বাঘেই মাছ।
চিগোন থাক্কে জুমত্, রেদোত্ অলে-পাগানা চিন্দিরে বুক্কোলই, কেমোত্ শিক-গাদেই-শিম্পুক পাত্তং। বেন্যে পোত্তে, আন্দারে বান্দারে-যেনেই দেগিদং-ছরা ছরা শিম্পুক পরি আগন। একতাল অহ্লে-ফোরানি ফেলেই হলা গুরি হেধং। আ, করোই গাজত্ কেস্কুম’রি তোগেদং। মর সারা জিংহানিয়ান কাদি যেইয়ে-উরিঙে মোন’ জুমে জুমে, মুরোয় মুরোয়, তারুম বনত, জুম চাবে-চাবে, তারেঙে তারেঙে মোন’ ঘরত। মোন’ জুরো আহ্ভায়, ফিবির ফিবির বোয়েরে, দাঙদাঙ্গে রোদ। চেরে পুগো রহ্ তারুম’সেরে-মা জিং-জিং, জিং গরন্ । হক্কেং দগরন, হরল্যেই টক টক গরি গাছ হুনন, সত্তাপেগে সনাত্তালি চরান। রেদোত অলে-ধুদুকাঙ, ধুদু ধুদু গরি দগরন, উরিঙ-চঙরায় তিক্ কারন্।
এ উরিঙে মোন’ কধা কহ্লে হারা থুম ন’ অহ্য়। এ উরিঙে মোন কত্তা দি, আমি সারা জিংহানি-য়ান উজল-লামন গরি পেই। ইধু কন’ বাজার নেই। চোল বুগি, ধান বুগি, মোন উদি-লামি দূরত্তুন বাজার হা পরে। পজিমে গেলে মারিচ্চে বাজার আ দুরছুরি আজার। আ, এহ্ধেদি গেলে উরিঙে বাজার হা পরে।  বাজারত্তুন ফিত্তে দি-তিন দিন লাগে। আধা-পধত্ বাহ্ থা’ পরে।তুওদ’ ইধু আমা আজুপিজু-উনে সুগে-দুগে জিংহানি কাদেই যেইয়ন। তারাত্তুন অমকদ’ ধোয্য-সহ্য এল’। দুগ পেলেও ওমা-হদা ন’গত্তাক। কন’ কোজ্জে কেরেঙাল ন’এল’। ভাগে-যুগে, উধোর দে-দি গরি জিংকানি কাদেই যেইয়ন। তুও তারা হুঝি এলাক, ভাদ’ রাত ন এল’ কন’ চিদে ন এল’।
মুই জুমবলা-জুম্ম অলেও, মরে মুই হুঝি। ম’ ধগে মুই সিধে, ম’ ধগে মুই অলর। মুই গব্ ন’ দুওং, গাল ন’ মাদং। মুই যিয়েন কোম্ সিয়েন গরং। মুই কাররে ভেজাল ন’ গরং, ন’ গবং-কাররে পিজুম ন গরং, গেইল্ ন’ দূওং। ম’ আহ্লে মুই থাং। মুই উজু উজু, লাগা টানা, মুই বেঙাহঙা ন বুজং।
মাত্তর, মরে যোলেলে-মুই কাররে ন’ ছারং। রাগ উদিলে মুই পিত্থিমিয়ান ঘিলে পারা দেঘং। মুরিম না বাজিম কয় ন’ পারং। কাররে হিয়ে ন’ গরং। ম’ হেজ মুই রজাং। ম’কাম মুই গরং। যে মাদিত আহ্ঝার হাঙ, সে মাদিত র্ভদি উধং।
মুই জুমো গান গাং, জুম্মো শিক হারং। জুম্মো গানদোই, হাজং-কানং, জুম্ম গানদোই নাজং। জুম্মো গেংহুলি শুনং। সিত্তেই দ’ মুই-জুমবলা-জুম্ম।
মুই জুমবলা-জুম্ম অয়নে যুনি, জুম ফেলেই ধেই পাঙ, সালেন মুই কিত্তেই জ্ম্মু অলুং? এ জুমো জাগা কারর নয়, জুম্মবাদে কিয়েই নানু হলে ন’ পারিবাক। জুমবলা, জুম্ম অয়নে যুনি- জুমো জাগাত-পর’সিধু আহ্ধ পাদন, গাবুর গরন, ঘরপাদা আহ্রান, জুম্ম হলেবার লাজান, পর’ কধা শুনি পান, সালেন কিত্তেই আমা আজুপিজু-উনে আমারে ইধু ফেলেই যেয়ন?  কিত্তেই আমারে জন্ম দূওন, পালেওন, ধাঙর গোচ্চন? আমি তারারে ন’ লাজেবং, তারা নাঙ ন’রাগেবং?
আ, যারা এ জুম ছারি, মরণ’ দরে, বাজিবার আঝায় বাহ্রে পরঙ্ যাদন, তারা কি সিধু মনতসুগে আঘন? তারা কি জাদরে বোয় নি পারিবাক? তারার জাদ, ভেই-বোন দ’ বেগ ইধু। জুম্মজাদ অহ্লে-তারার হামাক্কায় চিৎ পুরিবো, ইধোত্ উদিবো, মন কানিবো।
জুম আমার পরান, জুম আমার জিংহানি। জুমো জাগা আমারবাব-মা। ইয়েন আমা আজুপিজু-উনর দি যেইয়ে উমর’ ঘরপাদা। জুম-গরি আমি ইধু পরান বাজের। জুম-গরি আমি ইধু জিংহানি কাদেই পেবং। সেনত্তেই, এ জাগানি আমি ফেলেই ন’ যেবং, কাররে ন’ দিবোং, দি ন’ পারিবোং। দাত্ কামেরেই মরিবোং তুও ন’ ছারিবোং, ইরি ন’ দিবোং।
আমি এ জুমো জাগা ছারি কিত্তেই যেবং, কুধু যেবং? জুমো-জাগা আমা আজল ঘর-পাদা। ইয়েন ছারি আমি ন’যেবং, ন’যেবং আর বরপরঙ। সেনত্তেই দ’ আমি গীত গেই-
ন’ চাং যেবার এ জাগান ছারি, ইধু আঘং মুই জনমান পরি,
এ জাগা-আন রয়ে-দে ম’ মনান জুরি।