নিজোরে কেনে দোঙেবে? মন’লগে কেনে যিনিবে?

লেখকঃ ভেন, ডঃ কে, শ্রী, ধম্মানন্দ

চাঙমান্দি ভাঙ্গেঃ চাঙমা ত্রিপণ তেইয়া

তর কি কনদিন মনতদুগে মন-ভাঙি যেইয়ে? ত’ মনান কি কনবার ঝুরোতুরো, সারানাদা অইয়ে? এ লেগাআন তারারে গজেলুং, যারা অনজুর সুধো সুধো মনতদুগত থান, মনতদুগে মূকালা-গরি থান, মনে মনে আহঙি যান, মন’লগে ন’যিনোন। মনতদুগ আ মনভাঙি যানা, এ দিয়েন জামা-দারিদ, আমা মনত্ নিত্য পুন'পুন্যে আ জরাজজ্যে-গরি থায়। ইয়েনি, হারাক্কায় ফারগ গরি ন’ পারে। পিত্তিমিত্ ইয়েনি নানান মান্নো-মনত্, ডর’মর’-গরি এক সমারে বাহ্ বানে। গাঝর পরশাল্লো ধক্কেন, এমনত্তুন ও-মনত্ পার অহয়।

মনতদুগ-পানা আ মন ভাঙি-যানা বেচ্ এহধ-যাবর নয়। এ দিয়েন এক্কুই। ইয়েনি কিত্যেই অয়, কুত্তুন অয় আমাত্তুন তোগেই নীঘিলে পরিবো। ইয়েনি আমি, হারা ছারি ন’পাল্ল্যেও, ইয়েনিরে সজ-ইরি দিলে, অহলিপ গল্ল্যে ন’অহভ’। আমাত্তুন ইয়েনি-লগে হামাক্কায় জিদে পরিবো। যিঙিরি পারে ইয়েনিরে ওধেই-দিয়্যা পরিবো। বানা নিজো সেধামে, আমি ইয়েনিরে লারে লারে-গরি ছারি পারিবোং। মাত্তর, ইয়েনি হেলার কাম নয়। ইয়েনি ছারি পাত্তে, ইরি পাত্তে, যদেবদে চোক-রাঙা লাগিবো, দুগ গায়-শুয়ো পরিবো। মুরতপুরি ভাবিনেই, দোলেদালে বুঝিনেই, গমেদালে মাধা ঘামেনেই, সোত্পোত্তে মনান দোঙেই পারিবোং আ মনতদুগ ছারি পারিবোং। ভাঙিযেইয়ে মনান সোওর-গরি পারিবোং। 

মনতদুগ নিজো মন’ ভিদিরে চারা কাহ্রে। ইয়েনি আমি নিজে নিজে মনত্ গাধে রাগেই। ইয়েনিত্ আমি গঙ রাগেই ন’ পারি। রাগ, কুত্তুরি, গেইল দেনা, কজ্জে বাজানা ইয়েনি মন চিগোন, সেদাম নেইয়ে, অগুনর আ অঘা কাম। ইয়েনি এক্কান এক্কান পালং আ পরান আক্কেং। ইয়েনি আমা আদোঙেয়ে মন’ আধংকাজর, মিলেকুত্তুরি। মনতদুগ ঝারি ফেলেই পারিবার চেলে-আমাত্তুন আরও ভালুদ্দুর পথ আহধা পরিবো। আমাত্তুন, হামাক্কাই নিজোরে পুরি ফেলেবার, আমা মনরে-পরানরে দঙা পরিবো। বানা নিজো আলু কুরিলে ন’অহভ’। মান্নো সিধু কামত লাগানা, মানেই ভালেদি-কাম গরানা। ইয়েন-ওই এক্কান পথ, যিয়ত্তুন আমি আঝল মন’ সুন্জুক আ মনতসুখ পেবং।

কুদুক্কুন মান্নে এক্কাও লোব সামেলে ন’ পারন। মন’ডর আ মনতদুগ লগে ন যিনোন। ইয়েনি মান্নো সিধু হুলি কহবার, হাম হেবার লাজান। কিত্তেই, ইয়েনি ভারি বলি আ গঙ ধাঙর। ইয়েনিলই মনত্ পিরে বাহঝে। পিরেআন আগাত্তে ওই হারা পাদল ন’ অহয়। ধগেনলেন, জনমবদলে। তেহ্, মানুয অনচন’ আ আঙুআঙা অহন। ইয়েনি বেক্কানিরে, গম-ভাবনা গরি, মন’রে দোঙেই, মনরে মনে-মনজক্কাগরি ধাবেই দি পারে। কিত্তেই, আদোঙেয়ে মনে, কজরা মনে আমারে মনতদুগ লাগেই দে। আমারে যক্কেসক্কে শুম-মারায়। ভালেদ ওয় ন’পারে।

যক্কে তর মনত মনতদুগ ফুদিবো, সক্কে ত মু-কালাআন কাররে ন দেগেচ। ত’ মনতদুক্কান বানা তারারে দেগেবে, ভাঙি কহবে, যারা তরে বুঝেই পারিবাক। তরে মনতদুগ কাদেই দি পারিবাক। মনতদুগ’ পিরেয়ান পাদল-গরি দি-পারিবাক। তেহ্ সালেন, কধক দোল অধ’! গম অধ’! যুনি তুই মান্নো সিধু আহঝং আহঝং মুউ-গুরি থেই পাত্তে, যেধক তর মনভিদিরে মনতদুগ থেধ’ সাত্। ইয়েন নিজে-নিজে আক্কেং-গল্যে সেধক আগাত্তে নয়। আ কুদুক্কুন গাবুজ্যে গাবুরি অমকধ’ মনতদুগত্ থান, যক্কে তারা কোচপেয়ে মানুচ্চত্তুন পাত্তা ন’ পান। ধগেনলে, মনতদুগত থাক্কে থাক্কে, গঙ রাগেই ন’ পারি অগমানে, তারা নাতদি মরন।

মনতদুগে কিওরে ভুদে পায়, কিয়ে সন্ধবাজ মাদন, কিয়ে মনপিরে বাযান। তেহ্ মানসিক রুগি অহন। আর জিংহানিত, মনরে বুঝেই ন’ পারন, মন ভাঙি যায়। মনান ফিরেই ন’পারন। ইয়েনি বেক্কানি অহল’দে, মানেয় জিংহানিয়ান আলাজে কি জিনিস, দোলেদালে ন’বুঝনার কারণ।

যিঙিরি অহধ’ সাত্, মানেয় জিংকানিত, ফারগ অহনা বা ফেলে যানা ইয়েনি ছারি ন’পাজ্জে। ইয়েন, নয় জীবনর পোল্ল্যে অহয়, নয় জীবনর সংমধ্যে আ নয় জীবনর শেয কাদাল্ল্যে অহয় থায়। ইয়েন ঘদিলে আমাত্তুন হামাক্কাই কারণ তগেই নীঘিলে পরিবো। ফারগ অইনেও যুনি, মন ন’বুঝে আমাত্তুন ইয়েন সহ্য গরা পরিবো। জীবনান কি গমেদালে বুঝো পরিবো।

মাত্তর, আর’ এক কিত্তেন্দি, নূও সমাজ্জ্যে জুরি পারানা কন’ আগাত্তে নয়। খালি মনান যুনি আমি বুগ ভরিবার চেই। বুদ্ধ কইয়েদে, “বুগত, মনত্, র্ড-ফুধে অঘা আ ভুল মান্নো সিধু, চালাক মান্নো সিধু নয়।” ডরানা অহলদে’ মন’ অবস্থা। মনান বেক্কান নিজো উগুরে, কুন্দি নেযেম, কুবত রাগেম। বজং চিদে গল্লে মনত ডর সমে আ গম চিদে গল্লে মন’আঝা বারে, মন-গম অহয়। গম-বজং বেক্কানি, আমন’ মন’ উগুরে। নিজো মনরে দঙে পারিবার আমার বেক্কুনর সেদাম আঘে। গোজেনে আমারে বেক দোঙেবার বল দিয়্যা, এক্কান অহলধে’ চিদে গরানা, ভাবানা। ইয়েন, চিদে গত্তে গত্তে আর বুগত, মনত ডর ন থায়।

একদিন, ইক্কো পরিয়ে পুও, ইক্কো নামকরা সাহব্ত্তুন পুঝোর গজ্জেধে,“ ন ডরেবার বেগত্তুন গম-দারু কি?” তে যোব্ দিলো’ ”কারজনত্তেই এক্কান কিজু গরিবার জঘা চা”। পরিয়ে পুও-বোই কধাআন শুনিনে আমক অইয়ে। তেহ, আর’ পিঝোর গত্তে, তা মাস্তরবোই কর্হ, “তুই, এক সমারে, একবারে দিয়েন উগুধো চিদে গরি ন’ পারিবে।” কিত্তেই, এক্কান চিদে গল্লে আরক্কান ধেই যায়। যেন, ত’ মনান বেক্কান, কাররে বল দিবার যদেবদে মনে কহর, সেক্কে, তুই ত’ মনানত ডর ভোরেই ন’ পারিবে।

“মনতদুগে বয়জ-ওনাত্তুন বেচ্ ঝাদি-ঝাদি লুও-শুগেই নেযায়।” ডর, মনতদুগ আ মন-জাগুলুগ ইয়েনি বেচ্ আর কম নিজো-লগে গাধি থায়। হালিক, অনঝুর ডর আ মনতদুগ, মানেই-ওরে সারানাদা গরে। থাক্কে থাক্কে, গম মানুয অহন’সন’ আ অদ্ধঙ্গ অহন। “মান্নোরে কিঙিরি হুঝি রাগায়?” ইয়েন যুনি তুই জানচ্, সালেন তুই,আঝির-উঝির গরি পবিত্র-মনে, গমে-সুগে থেবে। কিত্তেই, সেক্কে ত’ মনানে, ত’ মনত্, কনদিন মনতদুগ সোমিবাত্তেই ন’দিব’।

(আর’ আঘে)

লেখকঃ ভেন, ডঃ কে, শ্রী, ধম্মানন্দ

চাকমায় অনুবাদকঃ

ত্রিপন চাকমা,

সহকারী শিক্ষক (ইংলিশ ভার্সন)।

বনফুল আদিবাসী গ্রিণহার্ট স্কুল এন্ড কলেজ।

মিরপুর-১৩, ঢাকা-১২১৬।